瑞士之旅 24/10 ~ 2/11 (Day 1 日內瓦 / 安納馬斯) - 手機相

由蘇黎世機場坐咗3個鐘車去日內瓦, 喺飛機瞓唔到, 一於打返杯啡, 食個早餐醒醒個人先 

之後就由日內瓦車站坐巴士去安納馬斯,

安納馬斯係法國東南部一個小城鎮, 係瑞士日內瓦交界

住呢區有少少麻煩, 由日內瓦上車係畀瑞士法郎,

但反方向出返嚟就要畀歐歐洲貨幣, 

好彩我買咗火車pass, 可以任搭唔駛錢. 

等巴士見到紅葉, 當然唔放過啦

book酒店時都唔知book咗去法國邊境,
Check in完就閒逛下, 可惜天氣唔太好... 個人又攰,
行咗一陣就去搵食, 去到法國! 我一定要食海鮮拼盆!

Day 1 嘅晚餐.. 已經好驚喜! 畀我閒逛時搵到呢間專食海鮮!

我要食seafood platter!

歐洲啲包包都好食啲~

食海鮮點可以冇白酒架, 喺法國當然order返支法國白啦~ 

個拼盆一上枱, 超開心呀! 

兩款法國蠔各半打, 一隻超爆膏大蟹, 蝦8隻, 螺300g , 細螺200g, 類似櫻花蝦200g, 生蜆半打! 龍蝦仔半打, 仲有我未食過嘅生青口半打! 超新鮮同好味! 

啲蠔鮮甜到呢.. .同香港食嘅真係冇得比.

生蜆同生青口, 個人比較鍾意蜆多啲, 因為肉身帶爽身, 而青口就偏淋身

啲膏多到.... 好邪惡呀... 唔理咁多, 食咗先算~

成盆嘢都係HKD 8XX 好抵! 3個人都食唔晒, 好飽.. 

最後甜品都食唔落啦..
第一日, 已經大大大滿足!

餐廳 : Taverne Maitre Kanter

Cake Order

早前媽咪有事

搞到個人好忙…好攰…

接咗幫人整蛋糕

都係好趕下完成. 

令到啲蛋糕裝飾都好求其… 

真係唔好意思呀... 

成個月前嘅蛋糕相, 而家先有時間post..

朱古力焦糖慕士蛋糕

綠茶、豆腐芝士蛋糕

9.24 媽咪無事啦!

這一個半月很忙很忙..

沒時間鑽研蛋糕..

連很簡單的卷蛋蛋糕也沒有時間弄....

媽咪跌倒右手骨裂要打石膏..

很多家務不能做..

甚至連沖涼也不能..

就這樣... 每天忙碌著家中事務...

忙碌加身心疲累..

但是我很享受這一個半月與媽咪那麼近的接觸..

隔天替她沖涼...

看見坦蕩蕩的她...

真正感覺得到.. 她真的老了很多... 

這一個半月..

 讓我學懂耐心聆聽她重複又重複的說話...

學懂耐心.. 耐性...

今天... 她拆石膏了...

醫生說骨的接駁生長很好...

妳要記住, 以後要小心點!

不要再八卦了..

今次.. 的小小意外..

就如妳所講..

因禍得福..

讓妳看真很多..

亦讓我可以好好的照顧妳..

母女感情比以前更好!

媽咪, 希望你健健康康! 

p.s. 張相雖然out focus, 但我鍾意.

我要盡快update返我之前旅行照片, 給自己一個回憶記錄.

7.1 Holiday Brunch @ Home

放假, 梗係要下下廚啦

『健怡版法蘭西多士』用煎取代炸，
再配上自家製果醬夾心，
淋上楓糖漿，中和雜梅嘅酸，甜中帶酸，非常之夾！
好味！(哈哈～又自己讚自己)

腸仔用烚取代煎，夠晒健康，無失其味道。

Strawberry Blueberry Jam

自家煮嘅果醬

 充滿果肉同清香

為美好一天帶來動力

食譜

5.24 遊走中上環飲食第二站 @ CAFE DECO PIZZERIA

去完西環貨物裝卸區後, 再繼續遊走中上環食.

遊下遊下就去到新東華醫院對面

被一間意大利餐廳吸引住. 

於是二話不說入去!

我哋坐高枱, 望住個PIZZA爐

時晚食咗藥關係, 唔敢飲酒, 只係飲暖咋... 

有人就飲啤酒引我...   

相隔一段時間.. 已經唔記得個名叫咩 .. 

燒羊肉沙律

什菌意大利飯 (好好味, 啲飯唔會過淋, 剛剛好)

唔記我叫咗個咩PIZZA...

不過佢個PIZZA好正, 好脆..我至愛呢款薄得嚟仲有口感嘅PIZZA

呢到環境唔錯, 一定會再嚟試埋其他嘢先~

青檸乳酪芝士蛋糕 (附食譜)

天氣咁熱, 食啲帶酸嘅蛋糕最適合不過啦.

早前整檸檬味, 今次見屋企有青檸, 一於.....

我用乳酪取代大量忌廉, 又加入青檸皮,
令青檸香味更加出.

青檸比起檸檬更加清香,
真係會不知不覺咁食多咗.

倒完落模之後見仲有少少芝士糊,
一於整返個靚靚杯裝版自私食先. 

食譜 : 6"模  (視孚個人喜好, 可用清蛋糕底 / 餅底)

材料 : Cream Cheese 250 g, 糖 70 g,  純乳酪 1 杯 (140-150g), 青檸汁 2個, 青檸青(皮) 1~2個, 魚膠片 10 g, 淡忌廉 100 g, 奶 50 g, 室溫水 60 g

做法 :

1. Cream Cheese放室溫回軟備用

2. 青檸刨皮, 唔要白色部份 (視孚個人喜好, 可選擇1個份量)
3. 刨皮後, 把青檸搾汁備用

4. 魚膠粉+水混合後坐熱水煮至完全溶化備用

5. 淡忌廉用電動打蛋機打至7~8成企身, 放回雪櫃備用

6. 忌廉芝士加糖用電動打蛋機打至滑身

7. 加入純乳酪及青檸青打勻

8. 加入青檸汁及奶拌勻

9. 再拌入魚膠液拌勻

10. 最後加入打起淡忌廉拌勻, 倒入已放蛋糕/餅底上, 雪3-4小時便成