Layer Birthday Cake (柚子蜜乳酪芝士,紅桑子夾心蛋糕)

有三個朋友生日, 諗咗好耐... 整咩好呢.. 於是....... 就諗到呢個組合啦!

海綿蛋糕底+柚子蜜乳酪芝士+紅桑子果凍+柚子蜜乳酪芝士+雲尼拿慕士+紅桑子鏡面

個晚食中菜, 之後配返呢個酸酸地嘅蛋糕!
果然係好夾! 決定係無錯嘅! 話事話, 呢個柚子蜜乳酪芝士餡.. 我係未整過架...
估估下, 溝溝下... 又搞掂!

嘻嘻~ 你哋又做咗我嘅白老鼠啦！

仲有，第一次玩藝術糖，未係好掌握到。

可能.. 天氣太熱啦... 一出一入... 去到酒樓.. 到食個時... 啲糖軟軟地同溶溶地...

好彩入盒前.. 影咗個真身! hehe.


最後.. 大家對我個蛋糕讚不絕口!
好開心喔! 

Today's Thought

快樂是有限的

痛苦同樣是有限的

只有回憶是無限

有些回憶是暗淡的 

有些回憶是絢爛的

就看你在哪兒想起它們

攝  雪兒
文  改自網絡

Today's Thought

不回望過去的苦惱

相信明天會更好

每天黑暗過後總會有黎明的一刻

攝 雪兒     澳洲．黃金海岸

元朗農場鮮奶有限公司

終於去試啦!

佢哋啲鮮奶真係好正!

好香奶味, 又夠凍! 好好飲!

由最初我order一杯, 到之後.. 忍唔住叫多盒中裝飲 ^^

 雪菜肉碎撈烏冬, 只限星期六, 日先有供應
.
個烏冬好彈牙, 好好味!
餐蛋出前一丁, 餐肉煎到好香口! 丁麵唔會over cook!
 又係好正!
不過杯奶茶就..... 奶太多啦... 冇茶味... 一定唔會再叫!
杯鮮奶咖啡還可以.. 咖啡味都算濃..

 

最後當然要試佢哋…即撞薑汁奶!

香濃薑味加奶味!

其實我仲想試佢嘅茶葉蛋, 芒果布丁... 可惜太飽.. 已經食唔落啦...

下次.. 一定要再試其他嘢!

農場鮮奶有限公司

地址 : 元朗石崗甲龍村雷公田78號 

Earl Grey with Rum Raisin Cream Roll (附食譜)

蛋糕材料 (雪芳蛋糕底) : 卷蛋, 我係用24 x 33 cm 焗盆

蛋黃 3隻, 蛋白 4隻, 砂糖 70g, 熱水 80-85g, 菜油 35g, 低粉 70g, 伯爵茶包 2包 

忌廉材料 : 淡忌廉 150 g, 糖 10 g, 酒浸提子 隨意

做法 (預熱焗爐170度) 

1. 把1個茶包放入熱水中泡茶備用 (最後只要茶水 70g) 

2. 蛋白打至起泡, 然後把40g糖分三次加入, 打至企身 (打完可先放雪櫃) 

3. 蛋黃加30g糖打至淡黃色 

4. 把70g茶水加進蛋黃糊中拌勻 

5. 再加入菜油拌勻 

6. 加入餘下的一個茶包, 把茶葉碎加入蛋糊中 

7. 最後加入己過篩之麵粉, 一起拌勻 

8. 取1/3蛋白霜加入蛋黃糊中拌勻 

9. 再把(8)的麵糊倒回蛋白霜中輕手拌勻, 倒入模內, 以 200度焗約10-12分鐘 

10. 蛋糕出爐後放在架上待涼, 把蛋糕轉往新的牛油紙上 (我個人喜愛以底作卷蛋面)

11. 忌廉, 糖一起打至半硬身, 再加入酒浸提子打至硬身

12. 塗上忌廉抆平 (頂端塗抹多點) 卷起定型, 放回雪櫃雪約1小時便成. 

907 第三十屆『泰基盃』十公里

久休後第一場10K比賽

又挑戰俗稱"魔鬼賽道"嘅泰基盃10K！
地點：西貢北潭涌郊野公園

再次同跑友一齊落場參加比賽，心情好興奮！

賽前預計比上年差，抱住輕鬆跑心態！
結果比上年快咗2分鐘！勁開心！
我估因為當日唔係好勁太陽！時陰時晴．

跑完嘅我，變成一個水人了．
今日嘅表現，
令我對日後大阪馬長課有一定嘅推動力！
得返一個月多啲咋．．．
我要加大油先得啦！

Blueberry Cheesecake (附食譜)

材料 (9") :

餅面
忌廉芝士 300g
牛奶 170g (分成兩份 100g + 70g)
砂糖 120g (原食譜135g) (平均分成2份)
蛋黃 55g
魚膠片(浸軟) 12g
淡忌廉 370g (打起)

餅底消化餅碎 150g
牛油溶液 65g
藍莓醬 200 ~ 250g (我用咗200g)

做法 :

1. 餅碎加牛油溶液拌勻後, 倒入模中壓平, 放入雪櫃備用
2. 忌廉芝士室溫放軟後, 打至滑身
3. 100g牛奶和1半糖煮沸
4. 70g牛奶, 1半糖和蛋黃一起攪勻. 將熱牛奶倒入蛋黃奶中攪勻, 再倒回煲內. 邊搞邊煮至80度 (即煲邊起泡便要熄火+離爐)
5. 加入已浸軟魚膠攪至魚膠完全溶解, 過篩, 待微暖, 分數次加入芝士糊中, 再以慢速攪拌.
6. 分兩次加入淡忌廉, 邊加邊拌成芝士餅漿, 最後倒進餅底模上.
7. 放入雪櫃冷凍, 最後加上藍莓醬